ශ්‍රී කල්‍යාණිවංශ නිකායේ අභිනව මහානායක ස්වාමීන් වහන්සේ ලෙස දෙවිනුවර මහනාහිමියන් පිදුම් ලැබූ වගයි.
අමරපුර ශ්‍රී කල්‍යාණිවංශ මහා නිකායේ 21 වන මහානායක ධූරයට මෙරට දැනට මහානායක ධූරයක් දරන වෘධ භාවයෙන් ඉහල එහෙත් අතිශයින් ම නිරෝගී නායක ස්වාමීන් වහන්සේ ලෙස දෙවිනුවර පරමවිචිත්‍රාරාම රාජමහා විහාරාධිපති සරණපාල වංශාලංකාර වාගීශ්වර ශ්‍රී සම්බුද්ධ සාසනාභිමාණි අතිපුජනීය ආචාර්ය දෙවිනුවර සිරිසුනන්ද නායක ස්වාමින් වහන්සේ පිදුම් ලැබුහ. මෙම පත්වීම කරනු ලැබ තිබුණේ ශ්‍රී කල්‍යාණිවංශ මහා නිකායේ කාරක සංඝ සභාව නිකායේ මුලස්ථානය වන දොඩන්දූව ශෛලබිම්බාරාම මහා විහාරයේදී 2023.05.28 දින රැස් වී ගත් ඒකමතික තීරණයට අනුව යි. 2019 ජූනි 8 දින සිට බලගැන්වෙන අමරපුර ශ්‍රී කල්‍යාණිවංශ නිකායේ සංශෝධිත ව්‍යවස්තා මාලාව ප්‍රකාර මෙකී නිකායෙහි කාරක සංඝ සභාව වෙත පැවරී ඇති බලතල ප්‍රකාර මෙම පත්කිරීම සිදුකර තිබෙන බව ද දන්වා සිටිමු.
ශ්‍රී කල්‍යාණිවංශ නිකායේ ශ්‍රීමත් මහානායක ධූරය සඳහා වූ ශ්‍රී සන්නස් පත්‍රය අතිපූජනීය දෙවිනුවර සිරිසුනන්ද මහනාහිමියන් වහන්සේට පිරිනමන ලද්දේ ජාතික පිච්චමල් පුජාවේ නිර්මාතෘ, ශ්‍රී කළ්‍යාණිවංශ නිකායේ අනුනායක ධූරන්දර අතිපුජනීය කොටපොළ අමරකිත්ති ස්වාමීන් වහන්සේ යි. ශ්‍රී කල්‍යාණිවංශ නිකායේ මහානායක ධූරය සඳහා වූ විජිනි පත පිරිගැන්වීම සිදු කරන ලද්දේ දොඩන්දූව සිරි සුනන්දාරාමාධිපති, ශ්‍රී කල්‍යාණිවංශ නිකායේ අනුනායක ධුරන්දර හික්කඩුවේ තිලක ස්වාමින් වහන්සේ විසිනි.
ශ්‍රී ලංකා වාසීව සිටි පැවිදි උතුමන් වහන්සේලා අතුරින් බිහි වූ වයසින් බෙහෙවින් ම වෘධභාවයට පත්වී සිටියා වූ මහා යතිවරයාණන් වහන්සේලා අතරට එක් වෙමින් දැනට 101 වන වියේ පසුවන දෙවිනුවර නායක මාහිමිපාණන් වහන්සේගේ නාමය මෙරට බෞද්ධ සාසනික ඉතිහාසයට මෙසේ එක් විය.
මේ සම්බන්ධයෙන් වන රාජ්‍ය උත්සවය ඉදිරි දිනක දී සිදු කරනු ලබයි.
