අමරපුර ශ්‍රී කල්‍යාණිවංශ නිකාය ආරම්භයේ සිටම ඉතා සිල්වත්, ගුණවත්, වියත්, සුපේශල, ශික්‍ෂාකාමී, ධර්ම විනයධර, සංඝ පීතෘන් වහන්සේලාගෙන් ප්‍රභාමත් වූ, ශ්‍රී ලංකාවේ සම්බුද්ධ ශාසනයෙහි චිරස්ථායිභාවය උදෙසා උත්තුංග මෙහෙවරක් සිදු කළ නිකායක් ලෙස අප නිකාය හැඳින්විය හැකිය. බෝධිසත්ව ගුණෝපලක්‍ෂිත, බ්‍රහ්ම ශ්‍රී පූජ්‍ය කතළුවේ ගුණරතනතිස්සාභිධාන මහාස්වාමීන්ද්‍රයන් වහන්සේ විසින් 1810 දී ආරම්භ කළ ශ්‍රී කල්‍යාණිවංශ නිකාය අද වන විට සුවිශාල ශාසනික සේවාවක් සිදුකළ, සිදුකරන කීර්තිමත් නිකායක් බවට පත්ව තිබීම අප නිකායික මෙන්ම අන්‍ය නිකායී සියලු දෙනා වහන්සේට ම සතුටු විය හැකි කරුණකි.
කතළුවේ ගුණරතනතිස්ස මහාස්වාමීන්ද්‍රයන් වහන්සේගේ සිට වැඩ සිටි මහානායක ස්වාමීන්ද්‍රයන් වහන්සේලාගෙන් නිකායාභිවෘද්ධිය සඳහා සිදු වූ සේවය සුළුපටු නොවේ.
මෑත ඉතිහාසය පිළිබඳව අප අවධානය යොමු කරණ විට කාලානුරූපීව ශ්‍රී කල්‍යාණිවංශ නිකායේ අභිවෘද්ධිය උදෙසා ක්‍රියා කළ ස්වාමිපාදයාණන් වහන්සේලා බොහෝ වෙති. ඒ අතර අප තපෝවන සම්ප්‍රදාය ඇති කොට වදාළ, පරමපූජනීය කම්මට්ඨානාචරිය, ශ්‍රී කල්‍යාණිවංශ නිකායේ අධිකරණ සංඝනායක කුඩාවැල්ලේ වංගීස ස්වාමිපාදයාණන් වහන්සේ කෘතවේදී ව සිහි කරමු. එසේම අප නාහිමියන්ගේ ශිෂ්‍යවරයෙකු ලෙස පැවිදිව මෙරටට සැදැහැ වඩන බෝධිපූජා ක්‍රමය හඳුන්වාදුන් පානදුරේ අරියධම්ම ස්වාමින්ද්‍රයන් වහන්සේ ලෝවැසි බොදුනු කිතුණු නන් ඈ ආගමිකයන්ගේ ද හදවත් සැනසූහ.
දේශීය වශයෙන්, විදේශීය වශයෙන්, ශ්‍රී කල්‍යාණිවංශ නිකායික සමස්ත භික්ෂු සංඝයාගෙන් සිදුවන සේවය අත්‍යුදාරය. ඇමරිකාව, සිංගප්පූරුව, කොරියාව ආදි විවිධ රටවල සම්භාවනාවට පාත්‍ර වෙමින් සුවිශාල ආගමික සේවාවක නිරත වන අප නිකායික සියලු ස්වාමිපාදයන් වහන්සේලා මෙහි දී ගෞරවයෙන් සිහිපත් කළ යුතුය.
වසර දෙසීය දහයක අනිර්වචනීය පරමොත්කෘෂ්ට ශාසනික සේවාවක නිරතව සිට අපවත් වී වදාළ අප නිකායේ අතිගෞරවනීය මහානායක ස්වාමින්ද්‍රයන් වහන්සේලා ප්‍රමුඛ සියලු ස්වාමීන්ද්‍රයන් වහන්සේලාටත් නිර්වානාවබෝධය වේවා! අද වැඩ සිටින අප නිකායික සියලු ස්වාමිපාදයන් වහන්සේලාටත් තෙරුවන්ගේ අපමණ ගුණානුභාව බලයෙන් චිරාත් කාලයක් ශ්‍රී කල්‍යාණිවංශ නිකාය ඉදිරියට පවත්වාගෙන යෑමට අවශ්‍ය ශක්තිය, ධෛර්ය හා නිදුක් නිරෝගි චිරජීවනය සැලසේවා!
