ශ්‍රී ලංකා අමරපුර නිකායේ ශ්‍රී කල්‍යාණිවංශ පාර්ශවයේ 214 වන උපසම්පදා පුණ්‍ය මහෝත්සවය මෙවර 2024 ජූනි 17 දින ශ්‍රී කල්‍යාණිවංශ නිකායේ මූලස්ථානය වන ශෛලබිම්බාරාම මූලමහා විහාරයේදී පැවැත්විණි.
ශ්‍රී ලංකා අමරපුර නිකායේ ශ්‍රී කල්‍යාණිවංශ පාර්ශවයේ මහානායක ධූරන්දර අතිපූජනීය දෙවිනුවර සිරිසුනන්ද මහානායක මාහිමිපාණන් වහන්සේගේ මූලිකත්වයෙන්, නිකායේ ධර්මධර විනයධර මහ සඟරුවනේ මඟපෙන්වීමෙන්, දිවයින පුරා නන් දෙසින් වැඩමවා වදාළ 200 කට අධික මහා සංඝරත්නයේ ආශිර්වාද මැද මේ පුණ්‍ය මහෝත්සවය සිදුකෙරිණි.
වර්ෂ 1810 ජූනි මස 17 දින දොඩන්දූව ශෛලබිම්බාරාම මූලමහා විහාරය කේන්ද්‍ර කරගනිමින් පරම පූජනීය කතළුවේ ශ්‍රී ගුණරතනතිස්ස මහා ස්වාමීන්ද්‍රයන් වහන්සේගේ ආදී කර්තෘත්වයෙන් අමරපුර ශ්‍රී කල්‍යාණිවංශ නිකාය ආරම්භ විය.
