දුර්ලභව මිනිසත් බව ලත් මනුෂ්‍යයකුට ලැබිය හැකි උතුම්ම දායාදය භික්ෂු භාවයයි. සාමනේර ස්වාමීන් වහන්සේ නමක් පාරිශුද්ධ වු උපසම්පදා ශීලය ලැබිමෙන් එය සම්පූර්ණ වේ. අමරපුර ශ්‍රී කල්‍යාණිවංශ නිකායේ දෙසිය දසවන උපසම්පදා උළෙල අති උත්කර්ශවත් අන්දමින් ගිංතොට ශ්‍රී ථූපාරාම රජමහා විහාරස්ථානයේ අභිනවයෙන් ඉදිකරන්නට යෙදුනු අමරප්‍රසාද නම් වූ බද්ධ සීමා මාලකයේදී ශ්‍රී බු.ව. 2565 ක් වූ ව්‍යවහාර වර්ෂ 2022 ක් වූ පෙබරවාරි මස 26 වනදින සිදු කරන්නට යෙදුණි.
ශ්‍රී ලංකා අමරපුර මහා නිකායේ උත්තරීතර මහා නායක ධුරන්දර අමරපුර ශ්‍රී කල්‍යාණිවංශ නිකායේ මහා නායක අග්ගමහා පණ්ඩිත අභිධජ මහාරට්ඨගුරු අතිපූජ්‍ය දොඩම්පහල චන්දසිරි මාහිමියන්ගේ පූර්ණ අනුශාසනා සහ ආශිර්වාදයෙන් අමරපුර ශ්‍රී කල්‍යාණිවංශ නිකායේ අනුනායක නින්දානේ වජිරඥාන මාහිමිපානන්ගේ වැඩමවීමෙන් සිදු කරන්නට යෙදුණි. තවද මෙම මහෝත්සවය සඳහා භික්ෂූන් වහන්සේලා විශාල පිරිසක් වැඩමකළ අතර වැවිලි කර්මාන්ත අමාත්‍ය රමේෂ් පතිරණ මහතා ඇතුළු ගිහි පාර්ශවයේ විශාල පිරිසක් සම්බන්ධ වූහ. මෙම උපසම්පදා පුණ්‍ය මහෝත්සවයේදී භික්ෂූන් වහන්සේලා 38 නමක් උපසම්පදා බවට පත් වූහ.
